有一段时间好多爱情片都以多个故事段落互相交织,胜在节奏明快又多明星睇,最经典当然係英国电影《真的恋爱了》(Love Actually),可以话係西片版《家有囍事》,每年圣诞新年都要睇一次!


今个佳节假期韩国都有一套同一手法嘅爱情片,就係爱情片大导郭在容执导嘅A Year End Medley (台译︰《缘来大饭店》)。郭导拍过《我的野蛮女友》等卖座大片,擅于铺排剧情伏笔,临尾先一嘢大爆发,睇到你要拎纸巾。(今次个彩蛋都相当估唔到!)


《缘来大饭店》由7段圣诞前发生喺酒店嘅爱情人情小故事组成,明星阵容有香港人熟悉嘅李光洙、润娥、李楝旭等,相当鼎盛。各条线嘅设定都十分引人入胜︰考唔到公务员兼失恋嘅姜河那,打算入住酒店自行了结,但係同饰演酒店接线生嘅润娥倾出人生希望;李楝旭係呢间酒店嘅CEO,遇上执房员元真儿,甚有“霸道总裁”故事况味;韩志旼饰演嘅酒店经理,以为暗恋多年嘅老友向佢表白,点知事情发展有落差。至于光洙就饰演经理人,犹疑住要唔要继续同一手捧红嘅歌手续约……电影唔止一味营造浪漫,其实都带出各人面对逆境嘅应对方法,好适合年尾睇,为自己打打气。


《缘来大饭店》喺韩国年尾档期上映,成为当地本土电影票房冠军,整体计只係输俾《蜘蛛侠︰不胜无归》同埋《皇家特工:第一任务》。台湾已经同步上映,呢类片喺香港绝对有市场,相信大家好快会睇到。

1.png